السلام عليكم ورحمة الله وبركاته
فطيرة التفاح الابل باى بلد المنشأ أمريكا زى ما كلنا عارفين
بس استحدثو دلوقت طرق جديدة غيرت فى شكلها وطعمها
انما الطريقة الاصلية القديييمة لها سمات واضحة
1 شكلها مش حلو اوى يعنى بس هى الطعم الأحلى
2 المكونات المسخدمة فى صنعها كلها بااااردة
3 لا يتم طهى التفاح فيها
ندخل فى الموضوع
المكونات للعجينة والحشوة
1 ونص كوب دقيق
سكر
ذرة ملح
وزبدة بااردة
ماء مثلج
تفاح يفضل الأخضر
عصرة ليمون
معلقة أرفة
صفار بيض
وفانيليا
دى المكونات
يوضع الدقيق
وعليه معلقة سكر
وذرة ملح
وكمية الزبدة تقطعيها مربعات وتكون من التلاجة وباردة
الكمية ممكن تقولى 10 معالق
او 150جرام تقريبا
تفكرى الدقيق بالزبدة بسرعة
بحيث تخدى بالك الزبدة متسحش
اه هتكلكع شوية فى الدقيق
مش مهم
ده المطلوب اساسا
بس بعد ما الدقيق يتشرب الزبدة شوية
تضيفى صفار بيضة معاه معلقة فانيليا
وتكملى عجن بايدك
ثم تضيفى من 1 الى 3 معلقة ماء متلج
متكتريش عن كده
هتلاقى العجينة بتتلم والدنيا بتحلو
بعد ما تتلم العجينة
تكوريها وتلفيها فى بلاستيك
وحطيها فى التلاجة نص ساعة
التفاح بقى
تقشريه
وتحطى عليه معلقة سكر بنى لو عندك
لو مفيش يبقى سكر عادى
ومعلقة ارفة
وعصرة ليمون
وتقلبيه كويس
وتحطيه فى مصفة عشان يصفى السوايل
لازم لما تحطيه فى العجينة تكونى شيلتى منه السوايل على اد ما تقدرى
وتقدرى بعدين تشربى الماية اللى هتنزل منه جميلة اوى
هنا التفاح فى المصفاة
لما تطلعى العجينة من التلاجة
تفرديها بالنشابة بالسمك اللى تحبيه
وتحطى القالب بتاعك عليها بالمقلوب وتقصى بالسكينة
وتخدى العجين المقصوص تكوريه وتفرديه تانى لعمل الغطا للحشوة
فيه ناس بتحب التفاح مكشوف
من غير غطا
وبيتكرمل فالفرن ويتحرق
بس انا بحب العجينة دى
طعمها فظيع جدا
بعد ما تحطى العجينة المقصوصة للقاع
تضربى صفار بيضة بشوية فانيليا
وتدهنى بفرشة العجينة المفرودة للقاعدة
عشان تعمل كعازل لمنع السوايل اللى هتنزل من التفاح انها تبل العجينة
وبعدين تحطى التفاح
ولكن حاولى انك ترصيه شوية بنظام
عشان اللعبكة هتخلى الشكل النهائى وحش
وكمان هترفع اوى الفطيرة عالفاضى وجوة فيه فراغات كتير بين التفاح
فحاولى تصفيه بنظام على اد ما تقدرى
حطى الوش للعجينة لتغطية الحشوة
والزقى الاطرافممكن تقرصيها بطريقة القطايف
او بأى شكل
وادهنيه بباقى صفار البيضة اياها
ورشى شوية سكر خشن عالوش
عشان يعمل لون فالفرن
وخرمى وش العجينة عشان متتنفخش جوة الفرن من البخار وتتقطع
وحطيها فى فرن 180 درجة
لمدة ساعة او زيادة
وامسكى نفسك بقى الساعة دى
عشان الروايح الجميلة هتطلع
اشى زبدة على ارفة
هتبخرلك البيت يعنى
واهى بعد ما طلعت
السبت 10 ديسمبر - 20:14 من طرف 
